SESORAH

SESORAH AMBAL WARSA KABUPATEN GROBOGAN Dening: Bambang Harmanto, S.Pd. Kaandharaken wonten ing Permadhani, Purwodadi 16 Maret 2012 Assalamu’alaikum wr. Wb. Para pepundhen, para sepuh tuwin pinisepuh ingkang kinabekten, para prayagung pangemban pangembating praja ingkang wicaksana ing budi, sumrambah dhumateng sagung para tamu kakung putri ingkang kinormatan. Minangkani pamundhutipun Bp Bupati lumantar juru paniti laksana, kula piniji atur sesorah babagan pengetan ambal warsa Kabupaten Grobogan ingkang kaping 286. Kasugengan, katentreman miwah kasarasan mugi tansah lumuntur saking Gusti Ingkang Maha Kuwaos, satemah mbabar daya pangaribawa, tumunten tumanduk dhateng kawula dasih. Para rawuh ingkang kinurmatan, Kabupaten Grobogan kawiwitan dinten senin Kliwon, 21 Jumadilakhir taun 1650 Jawa utawi 4 Maret 1726 kanthi sengkalan, KOMBULING CIPTO HANGROSO JATI  lan KRIDHANING HANGGA HAMBANGUN PRAJA. KOMBULING CIPTO HANGROSO JATI, tegesipun: (0)        KOMBULING : saking tembung:  mumbul, muluk, kawentar, manunggal (5) CIPTO : saking tembung: angen-angen, gegayuhan, krenteging ati. (6) HANGROSO : saking tembung: rasa batin, rumangsa, pangrasa. (1) JATI : saking tembung: sejati, yekti, suci. Werdinipun inggih menika: manunggaling gegayuhan luhur lelandhesan kapitadosan dhumateng Gusti Ingkang Maha Kuwaos, saengga nuwuhaken greged nindakaken kasaenan, awit ngrumaosi bilih manungsa cinipta inggil martabatipun. Menggah sengkalan KRIDHANING HANGGA HAMBANGUN PRAJA Tegesipun mekaten. (6) KRIDHANING : saking tembung: kridha, gawe, obah, kerja (2) HANGGA  : saking tembung: hangga, perangan badan, tenaga (7) HAMBANGUN : saking tembung : mangun, damel, nyipta (1) PRAJA : saking tembung : praja, nagara, nagari, negara Werdinipun bilih ulah kridha kita namung kagem mangun nagari sumrambah samudayanipun nuninggih, manusia, bangsa, dalasan pemarentah nagari). Sejarah mratelaaken bilih ing wedal menika Sinuwun Amangkurat IV maringi kapitadosan dhumateng abdi dalem nununggih Ngabei Wongsodipo minangka Bupati Monconagari Grobogan kanthi sebatan Raden Tumenggung Martopuro utawi Adipati Puger, nuninggih bupati Grobogan ingkang angka sepisan. Dumugi titiwanci menika Kabupaten Grobogan sampun 31 periode kepemimpinan Bupati. Para Rawuh, Kanthi tema “ Dengan semangat hari jadi ke-286 Kabupaten Grobogan, kita tingkatkan kualitas Grobogan yang bersih, sehat, mantap, Indah ” Kabupaten Grobogan nggadhahi tekad ngejawantahaken sesanti BERSEMI. Pamanggih menika adhedhasar bilih Kabupaten Grobogan sampun dumugi ing titiwanci nedya mujudaken Bersih sehat, mantap, Indah, salebeting bebrayan saengga saged ndaya-daya menggah pentingipun kebersamaan saha guyupipun  njagi  lingkungan hidup murih lestantunipun bebrayan saha pembangunan ingkang berkelanjutan. Raos bombong saha bingahing manah, bilih Kabupaten Grobogan pikantuk pinten-pinten penghargaan Nasional. Ing antawisipun juara I tingkat Nasional kelompok tani berprestasi komoditas kedelai, penghargaan Satya Lencana di Bidang Pembangunan Pertanian, Penghargaan Satya lencana Wirakarya Bidang KB, lan sanes2ipun. Ing wasana, Pengetan ambal warsa Kabupaten Grobogan ingkang kaping 286 menika, sampun ngantos namung dados upacara kemawon ingkang tanpa teges, ananging sageda nggigah panggalihipun bebrayan ageng supados andhedherek cancut taliwanda ing madyaning pembangunan Kabupaten Grobogan supados langkung majeng saha pinanggih ing karaharjan. Kathah kaladuking atur kula nyuwun agunging samodra pangaksami, sugeng hamirsani ringgit purwa kanthi lakon “Sumantri ngenger” dening Ki Joko Hadiwijoyo ngantos pari purna . Wassalamu’alaikum wr. Wb.